ກອງປະຊຸມເຈົ້າຫນ້າທີ່ອາວຸໂສອາຊຽນ ໄດ້ຈັດຂຶ້ນໃນວັນທີ 21 ສິງຫາ 2024 ທີ່ ຫຼວງພະບາງ, ພາຍໃຕ້ການເປັນປະທານຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ, ໂດຍມີບັນດາຫົວໜ້າເຈົ້າໜ້າທີ່ອາວຸໂສອາຊຽນ ແລະ ຕີມໍແລັດສະເຕ ແລະ ຮອງເລຂາທິການໃຫຍ່ອາຊຽນ ພ້ອມດ້ວຍຄະນະ ເຂົ້າຮ່ວມໃນກອງປະຊຸມ.
ກອງປະຊຸມເຈົ້າໜ້າທີ່ອາວຸໂສອາຊຽນ ຄັ້ງນີ້ ໄດ້ປຶກສາຫາລືການຈັດຕັ້ງຜັນຂະຫຍາຍຜົນຂອງກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ບັນດາກອງປະຊຸມທີ່ກ່ຽວຂ້ອງ ທີ່ໄດ້ຈັດຂຶ້ນໃນວັນທີ 21 – 27 ກໍລະກົດ 2024, ແລະ ການຈັດຕັ້ງປະຕິບັດ 9 ບູລິມະສິດ ສຳລັບການເປັນປະທານອາຊຽນຂອງ ສປປ ລາວ ເພື່ອຜັນຂະຫຍາຍຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ຊຶ່ງໂດຍລວມແມ່ນມີຄວາມຄືບໜ້າດີ. ກອງປະຊຸມ ຍັງໄດ້ ປຶກສາຫາລືການຈັດຕັ້ງປັດຕິບັດແຜນດໍາເນີນງານ ສຳລັບ ຕີມໍແລັດສະເຕ ເພື່ອກຽມເຂົ້າເປັນສະມາຊິກສົມບູນອາຊຽນ; ການສະໝັກຂອງບັນດາປະເທດນອກພາກພື້ນເພື່ອເຂົ້າເປັນພາຄີຂອງສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສຽງໃຕ້ (TAC). ພ້ອມນັ້ນ, ກໍໄດ້ປຶກສາຫາລືການຮ່ວມມືອາຊຽນກັບພາຍນອກ ແລະ ອັນສໍາຄັນແມ່ນໄດ້ປຶກສາຫາລືການກະກຽມດ້ານຕ່າງໆ ໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ທີ່ຈະຈັດຂຶ້ນໃນວັນທີ 8 – 11 ພະຈິກ 2024 ທີ່ ນະຄອນຫຼວງວຽງຈັນ, ຊຶ່ງຈະມີປະມຸກລັດ ແລະ ຫົວໜ້າລັດຖະບານຂອງບັນດາປະເທດສະມາຊິກອາຊຽນ ແລະ ຄູ່ເຈລະຈາຂອງອາຊຽນເຂົ້າຮ່ວມ.
