ໃນວັນທີ 23ສິງຫາ 2024 ທີ່ ນະຄອນຫຼວງພະບາງ,ທ່ານ ທອງຜ່ານ ສະຫວັນເພັດ,ຮອງລັດຖະມົນຕີກະຊວງການຕ່າງປະເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງສປປລາວໄດ້ໃຫ້ກຽດກ່າວເປີດກອງປະຊຸມສໍາມະນາ ວຽກງານການເຊື່ອມຈອດອາຊຽນ ຄັ້ງທີ 15 (15th ASEAN Connectivity Symposium)ພາຍໃຕ້ຄໍາຂວັນ “ເພີ່ມທະວີການເຊື່ອມຈອດເພື່ອອາຊຽນທີ່ເຂັ້ມແຂງ,ມີນະວັດຕະກໍາ, ມີຄວາມຄ່ອງແຄ່ວ ແລະ ມີປະຊາຊົນເປັນແກນກາງ” (Enhancing Connectivity for Resilient, Innovative, Dynamic, and People-Centred ASEAN)ຊຶ່ງຈັດໂດຍສໍານັກງານຜູ້ຕາງໜ້າຖາວອນ ແຫ່ງ ສປປ ລາວປະຈໍາອາຊຽນ, ກອງເລຂາອາຊຽນ ແລະສະຖາບັນຄົ້ນຄວ້າເສດຖະກິດສໍາລັບອາຊຽນ ແລະ ອາຊີຕາເວັນອອກສຽງໃຕ້ (ERIA), ໂດຍມີບັນດາຜູ້ຕາງຫນ້າທັງຈາກພາກລັດ ແລະ ພາກທຸລະກິດຈາກບັນດາປະເທດສະມາຊິກອາຊຽນ ແລະ ບັນດາຄູ່ຮ່ວມມືຂອງອາຊຽນ ປະມານ 120 ທ່ານເຂົ້າຮ່ວມ.
ຈຸດປະສົງຂອງກອງປະຊຸມສໍາມະນາຄັ້ງນີ້ ແມ່ນເພື່ອແລກປ່ຽນຄໍາຄິດເຫັນ ແລະ ບົດຮຽນ ກ່ຽວກັບການຈັດຕັ້ງປະຕິບັດບັນດາຂໍ້ລິເລີ່ມຕ່າງໆ ໃນຂອບວຽກການເຊື່ອມຈອດໃນພາກພື້ນ, ຊ່ອງທາງໃນການເພີ່ມທະວີການຮ່ວມມືລະຫວ່າງປະເທດສະມາຊິກອາຊຽນກັບບັນດາຄູ່ເຈລະຈາ, ຄູ່ຮ່ວມພັດທະນາ ແລະ ຄູ່ຮ່ວມມືພາຍນອກອື່ນໆ ລວມທັງພາກທຸລະກິດ ໃນການຈັດຕັ້ງປະຕິບັດວຽກງານການເຊື່ອມຈອດອາຊຽນ. ນອກນັ້ນ, ຍັງເປັນການເຜີຍແຜ່ຄວາມສໍາຄັນຂອງວຽກງານການເຊື່ອມຈອດໃນຂະບວນການສ້າງອາຊຽນໃຫ້ມີຄວາມຮຸ່ງເຮືອງ ແລະ ເຂັ້ມແຂງ.
ໂອກາດດັ່ງກ່າວ, ທ່ານຮອງລັດຖະມົນຕີ ທອງຜ່ານ ສະຫວັນເພັດໄດ້ເນັ້ນໃຫ້ເຫັນເຖິງຜົນສໍາເລັດຂອງວຽກງານການເຊື່ອມຈອດໃນອາຊຽນທັງໄລຍະຜ່ານມາ ກໍ່ຄືທິດທາງໃນຕໍ່ໜ້າ, ເຊິ່ງເປັນໜຶ່ງໃນບູລິມະສິດການເປັນປະທານອາຊຽນຂອງ ສປປ ລາວ ໃນປີ 2024 ພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງຂອງອາຊຽນ”ແລະ ທ່ານ ທອງຜ່ານ ສະຫວັນເພັດ ຍັງໄດ້ຖືໂອກາດນີ້ຊຸກຍູ້ບັນດາຜູ້ເຂົ້າຮ່ວມແລກປ່ຽນຄໍາຄິດຄໍາເຫັນກັນຢ່າງກົງໄປກົງມາ ເພື່ອສືບຕໍ່ປະກອບສ່ວນເຂົ້າໃນການຈັດຕັ້ງປະຕິບັດແຜນງານການເຊື່ອມຈອດອາຊຽນ2025 ໃຫ້ມີປະສິດທິພາບ ແລະ ການສ້າງແຜນຍຸດທະສາດ ກ່ຽວກັບການເຊື່ອມຈອດອາຊຽນໃນອະນາຄົດ.
){kind=link}